Información sobre a actividade

A Rede de Custodia Agraria continúa a traballar xunto con gandeiros e gandeiras comprometidos coa conservación da biodiversidade agraria. Como parte deste compromiso, o vindeiro domingo 9 de novembro celebraremos unha nova xornada aberta de voluntariado e mellora ambiental na Gandaría Josmar, situada no concello de Baralla.

Nesta ocasión, a actividade centraráse na creación dunha nova charca dentro da finca, un espazo que servirá como hábitat para anfibios, invertebrados e outras especies silvestres, contribuíndo á mellora da biodiversidade e á saúde ecolóxica do territorio.

Durante a xornada coñeceremos o traballo desta gandaría, que aplica manexo rexenerativo e prácticas agroecolóxicas, e colaboraremos na construción da charca mediante accións prácticas de restauración e plantación de vexetación de ribeira. Ademais, comentaremos como estas medidas contribúen a un modelo produtivo sostible, que coida o solo, a auga e a fauna local.

Ao remate, compartiremos un espazo de encontro e conversa sobre custodia do territorio e agroecoloxía, acompañado dunha degustación de produtos locais da Reserva da Biosfera Terras do Miño, un momento ideal para intercambiar experiencias e fortalecer lazos entre participantes.

💚 Esta actividade está subvencionada pola Deputación Provincial de Lugo e conta co apoio das entidades locais implicadas no proxecto.

👉 Podedes reservar a vosa praza no seguinte formulario: