Asociación Galega de Custodia do Territorio

Pódese considerar a compra de Doñana ou a creación do Refuxio de Rapiñas de Montejo de la Vega (Segovia) como as primeiras experiencias de custodia do territorio en España. Desde entón foron nacendo outras iniciativas en entidades adicadas en maior ou menor grao á custodia: Adenex, a Sociedad Española de Ornitología, a Fundación Oso Pardo, GOB Mallorca, Fundación Hombre y Naturaleza e a Fundació Territori i Paisatge son só algunhas delas.

Pero a custodia como movemento non irrompe no ámbito conservacionista español até os primeiros anos do século XXI. A declaración de Montesquieu, asinada no ano 2000, representa o inicio do movemento de custodia en España. A creación da Xarxa de Custòdia del Territori no ano 2003 en Cataluña supón un forte impulso a este movemento pola súa forza e dinamismo. Posteriormente, créanse novas redes territoriais de entidades de custodia: Avinença en Valencia, no ano 2005, e Ínsulas en Andalucía, en 2006.

No ano 2004 celébranse as I Jornadas Nacionales de Custodia del Territorio en Torre Guil (Murcia), que se converten no foro de referencia da custodia en España.

A Lei estatal 42/2007 do patrimonio natural e a biodiversidade recolle, por primeira vez nun texto lexislativo, a custodia do territorio como ferramenta de conservación, no que debería ser o primeiro paso cara o seu recoñecemento institucional e lexislativo.

No ano 2008 iniciouse desde a entidade pública Fundación Biodiversidad a Plataforma de Custodia del Territorio co fin de fomentar desde a Administración estatal a promoción e o desenvolvemento da custodia. A nosa asociación forma parte do consello asesor de dita plataforma.