Vaipolorío é un magnífico exemplo de como unha iniciativa cidadá pode reconducir algunhas situacións de deterioración ambiental dunha maneira participativa, leda e eficaz.

Parabéns!

Mas información en:

• “El Concello legitima la labor ambiental de Vaipolorío”. La Voz de Galicia. 26/01/12

Acciónatura é unha ONG de ámbito estatal dedicada á recuperación e conservación da biodiversidade, na que aplica diversas ferramentas, entre outras, promove a creación dunha rede de espazos protexidos a través de acordos de custodia, aluguer ou compra de fincas.

O proxecto comeza no ano 2006 coa sinatura dun acordo entre Acciónatura e a Dirección Xeral de Montes, co cal, a primeira se compromete a realizar actividades de educación ambiental e traballos de mellora selvícola en montes comunais conveniados coa administración, en función da dispoñibilidade de recursos. A zona de traballo sitúase no Distrito Forestal VII: A Fonsagrada – Os Ancares, concretamente nos concellos das Nogais e Pedrafita do Cebreiro.

Localización do proxecto

As actividades realizadas consistiron en tarefas de educación ambiental en centros de ensino da zona, coas que se pretendeu dar a coñecer a importancia da conservación dos bosques naturais maduros e concienciar da necesidade de coidar do territorio no seu conxunto. Outras actividades levadas a cabo durante estes anos consistiron en traballos propiamente selvícolas en reboleiras e bidueirais xóvenes, fundamentalmente clareos e podas. O obxectivo é mellorar a estrutura forestal, favorecer a rexeneración natural e consolidar as masas arboradas. Ao mesmo tempo conséguese a diminución do risco de incendios, debido a que se rompe a continuidade vertical da vexetación. Tamén se estableceron plantacións con especies autóctonas en pequenas parcelas co obxectivo de conectar distintas manchas de bosque e así aumentar a súa superficie.

Panorámica dunha das zonas do proxecto

Durante o ano 2011, xa coa colaboración da AGCT, deuse continuidade ao proxecto. Neste ano, fixéronse tratamentos de mellora forestal en 4,2 hectáreas de bosque de reboleira, plantacións en 2 ha de superficie, nas que se utilizou unha mestura de especies autóctonas, principalmente rebola (Quercus pyrenaica), bidueiro (Betula celtiberica), faia (Fagus sylvatica), e carballo (Quercus petraea). Ademais disto, realizouse unha reposición de marras nunha plantación feita no ano 2010.

Vista da reboleira na que se realizaron traballos selvícolas

Vista dunha zona de reposición de marras

Para máis información visitar as seguintes ligazóns:

• Información no web de AccioNatura, entidade promotora do proxecto.

Máis información sobre os valores naturais dos Ancares:

• Descrición da Zona de Especial Protección dos Valores Naturais dos Ancares
• Ficha de datos do Ministerio de Medio Ambiente (pdf 292 kB)
• Rexión Ancares – Caurel en Naturagro
• Os Ancares en Turgalicia

O pasado sábado 24 de decembro a AGCT participou nunha tertulia sobre Custodia do Territorio en Doniños, (Ferrol).
Esta actividade encadrouse no programa piloto de dinamización cultural na zona rural do concello de Ferrol e tiña como obxectivo responder as inquietudes manifestadas polos veciños da parroquia de Doniños no eido da conservación e valorización do seu patrimonio natural e cultural.
O noso secretario, Óscar Rivas, expuso os conceptos teóricos da Custodia do Territorio como ferramenta participativa de conservación do patrimonio natural e cultural asociado, así como a situación actual deste movemento na nosa contorna.
Esta intervención foi seguida da participación de Rafael Beceiro, do proxecto Esmelle , quen apresentou unha aplicación práctica da custodia do territorio, expoñendo os proxectos desenvolvidos pola asociación de veciños da parroquia de Esmelle no mesmo municipio de Ferrol.
É de salientar que a participación veciñal no concello de Ferrol e nos territorios limítrofes alcanza cotas moi altas en relación ao normal no resto de Galicia. A existencia deste sustrato social converte a esta área nunha zona de interese para desenvolver actividades de custodia do territorio. Esperemos que así sexa, e que a custodia avance de forma imparable nesta comarca.

Mesa redonda na Feira Terractiva

Ao día seguinte, o domingo 18 de decembro, a AGCT estivo presente en Terractiva, a maior feira ecolóxica de Galicia, que se celebra cada ano por estas datas en Arzúa. Ademais da exposición e venda de produtos ecolóxicos, terapias alternativas e de artesanía, nesta feira realízanse talleres formativos, conferencias, música e proxección de documentais.
A Asociación Galega de Custodia do Territorio participou nesta edición nunha mesa redonda o domingo á tarde xunto con outras entidades (Fragas do Mandeo, Ridimoas, Adega e Ulla-Deza) falando, como non, da custodia do territorio en Galicia.
Como vedes a Custodia do Territorio está de actualidade na nosa terra.

A Asociación Galega de Custodia do Territorio participa nesta edición nunha mesa redonda o domingo á tarde (ás 17:00) xunto con outras entidades (Fragas do Mandeo, Ridimoas, Adega e Ulla-Deza) falando, como non, da custodia do territorio en Galicia.

Esta actividade realizarase no Recinto Feiral de Arzúa e podedes obter máis información na súa páxina web.

En novembro do ano 2006 tivo lugar o Foro-Reunión sobre custodia do territorio convocado polo Ministerio de Medio Ambiente e Medio Rural e Marino. Neste encontro unha serie de organizacións vencelladas á custodia do territorio tiveron a oportunidade de debater e reflectir en torno ás necesidades e prioridades que enfrenta esta estratexia de conservación do patrimonio natural e a biodiversidade. Entre outros resultados, nesta reunión acordouse a creación dun órgano informal de traballo en rede que creará unha canle de coordinación e comunicación entre as diferentes redes e entidades de custodia do territorio no ámbito estatal e que por súa vez actuase como interlocutor entre o movemento de custodia do territorio e as diferentes administracións e ámbitos sociais de interese para a custodia.

Após cinco anos de traballo, as redes e entidades de custodia, e outras organizacións membro celebraron a formalización legal do Foro Estatal como asociación. O Foro Estatal de Custodia conta con 13 organizacións fundadoras, 7 redes territoriais de custodia e outras 3 organizacións que apoian a iniciativa.

Formarán a primeira xunta do Foro Avinença – Asociació Valenciana de Custodia i Gestió Responsable del Territori, Fundación Global Nature, Iniciativa per a la Custodia del Territori de les Balears, Ínsulas – Red Andaluza de Custodia del Territorio, Red de Custodia del Territorio de Castilla y León, Xarxa de Custodia del Territori (Cataluña) e a nosa asociación, en representación da recén creada Agrupación Galega de Entidades de Custodia do Territorio.

Constitución do Foro Estatal de Custodia do Territorio

Esta última entidade, a Agrupación Galega de Entidades de Custodia do Territorio, constituiuse en outubro de 2011 por iniciativa da Asociación pola Defensa Ecolóxica de Galicia (ADEGA), a Fundación Fragas do Mandeo e a nosa asociación, co obxectivo de colaborarmos na promoción institucional, social, legal e técnica da custodia do territorio. A agrupación nace coa vocación de servir de primeiro paso para a constitución dunha futura Rede Galega de Custodia do Territorio

Nos últimos anos, iniciáronse no noso país, diversas experiencias de conservación do medio empregando esta ferramenta.

ADEGA (Asociación para a Defensa Ecolóxica de Galiza) e a AGCT (Asociación Galega de Custodia do Territorio) e co financiamento da Deputación da Coruña, organizan o primeiro Encontro Galego de Custodia do Territorio co obxectivo de analizar a situación en Galiza, as súas posibilidades de futuro e presentar á cidadanía esta estratexia de conservación.

Santiago de Compostela, 29 e 30 de outubro de 2011
Centro Social Novacaixagalicia, Praza de Cervantes

Inscrición gratuita no 981 570 099 antes do 26 de outubro

Realizaremos unha visita ás principais zonas do Parque Natural e os seus arredores prestando atención ás diferentes especies botánicas presentes na zona e disfrutando da paisaxe caliza desta área do mediterráneo galego.

Este Training Day realizarase o dia 21 de maio (sábado) e comezará as 10:30 no mirador de Vilar de Silva. Aquí podes ver un mapa de GoogleMaps onde se aprecia o lugar de quedada:

View Larger Map

Os Training Days son gratuítos pero non se cubre ningún gasto. É obrigatorio solicitar reserva de prazas debido a que hai prazas limitadas. Os interesados podedes enviarnos un correo co voso nome e un teléfono móbil (necesario por seguridade e para quedar no punto de encontro).

Os desprazamentos levaranse a cabo en vehículos propios. Como a orixe de cada persoa é dun lugar diferente de Galicia é imposible o aluguer dun autobús. Indicádeme o lugar de orixe, se dispoñedes de vehículo propio e se este ten prazas libres para agrupar ós participantes no menor número posible de coches. Recordade que debemos minimizar o gasto de combustibles fósiles e a emisión de CO2 á atmosfera.

Para a comida recomendamos levar bocata ou similar para non gastar moito tempo. Non pararemos en ningún lugar para facer compra polo que a comida debe traerse de casa. Non vos esquezades da bebida. Recordade que Enciña da Lastra está situada nunha zona mediterránea de moita calor polo que pode ser necesario moita cantidade de auga, gafas de sol e protección solar.

Para calquera dúbida, podedes poñervos en contacto con nós en calquera momento.

Contacto:
Martiño Cabana Otero
Tellado, 8 Romeán (Lugo)
27141 LUGO
630-948293
mcohyla@yahoo.es

Pola mañán celebramos a asemblea xeral anual e pola tarde celebramos un acto de homenaxe a Félix Rodríguez de la Fuente que tamén nos serviu como actos de apertura do noso relucente Centro de Conservación e Estudo da Natureza “Casa das Ínsuas” .

O primeiro punto do orde do día tratado na Asemblea foi precisamente dar conta do convenio mediante o cal o Concello de Rábade nos cede o edificio do antigo concello vello para usármolo como sede da AGCT, centro de interpretación, lugar de traballo, auditorio e centro de documentación. Tamén se deu conta dos traballos realizados durante as semanas previas por socios e amigos para pór todo a punto, traballos dos que xa vos informamos en entradas anteriores deste blogue.

A Casa das Ínsuas vai ter varias funcións alén de servir de sede da nosa asociación. Ten xa un Centro de Documentación que reune fondos bibliográficos relacionados co estudo e conservación da natureza, depositados por diversas entidades e persoas a título individual. Estos fondos están ao dispor de calquer interesado nestes temas. O Centro de Documentación pode ser utilizado asemade, como sala de xuntas por aquelas entidades que o desexen.

A Casa dispón tamén dun Centro de Interpretación formado por tres salas que xuntan unha superficie de mais de 100 m2 dedicada á exposicións.   

Outro espazo da Casa é unha sala que servirá de viveiro de entidades naturalistas, que disporá de todos os requerimentos básicos de oficina: postos de traballo, ligazón a internet, impresora multifunción, cafeteira, etc. O uso compartido deste espazo con outras entidades pretendemos que favoreza o troco de ideas, as sinerxias e o traballo en rede.

Por último, a Casa ten un auditorio fantástico para celebrar reunións, asembleas, palestras e todo tipo de eventos.

Tendes máis información no web da Casa das Ínsuas

O segundo punto da orde do día foi informar do estado do proxecto de custodia da Carballeira de Sorretas, na península do Morrazo. Expúxeronse as dificultades que estamos tendo pera comprar parcelas ben como a estratexia para os próximos anos. Proximamente daremos información mais comprida deste proxecto.

O seguinte punto tratou das xestións ante a Consellaría de Medio Rural relativas ao proxecto de Lei de Mobilidade de Terras e o Banco de Terras de Galiza, que poden ser unhas poderosas ferramentas para o desenvolvemento da custodia do territorio no noso país.

O noso secretario deu conta do proceso constitutivo do Foro Estatal da Custodia do Territorio, no que participa a nosa asociación. Na asemblea informouse das actividades realizadas no último ano, aprobáronse as contas do periodo anterior e o orzamento para 2011 e deuse de alta aos novos socios.  No derradeiro punto da orde do día, decidiuse renovar a Xunta Directiva coa mesma composición que a actual.

Unha vez concluído os actos da mañán socios e amigos fomos comer xuntos a un restaurante situado nun lindo entorno á beira do río Ladra onde desfrutamos dun delicioso xantar e unha animada conversa.

Vémonos mañán, non faltedes!