A Asociación en EL PAIS
En resposta á nota de prensa que se enviou desde a Asociación con motivo do lanzamento do noso web, o xornal EL PAIS dedicou o pasado día vintesete de decembro unha reportaxe ao movemento galego da custodia do territorio. Ao longo dos dous artigos da reportaxe, o xornalista fai un percorrido polas distintas organizacións existentes hoxe en día: a nosa Asociación, Ridimoas, Hábitat, Drosera, Numenius, Proxecto Ríos e Vaipolorío.
Podedes ler a reportaxe nas seguintes ligazóns: Colectivos naturalistas compran terrenos para garantizar su conservación y El fin de semana es para los ríos.
Nace o web da AGCT
Após un longo período de tempo dedicado á posta en marcha da nosa Asociación, hoxe temos o pracer de presentarvos o noso novo web. Neste espazo queremos dar a coñecer a Asociación, os proxectos que temos en marcha e as novas sobre a custodia do territorio na Galiza.
Como vedes o web ten formato de blogue. Está formado pola típica bitácora de novas, da cal esta é a primeira entrada, e por varias páxinas de información sobre a organización e a custodia que iremos completando. Pretendemos, coa vosa axuda, que este espazo sexa o punto de encontro de referencia da custodia do territorio na Galiza.
Queremos, por tanto, convidarvos a participar nas actividades que vaiamos desenvolvendo, colaborando na xestión dos proxectos concretos de custodia, informando de novas oportunidades de custodia de espazos interesantes, participando no web coas vosas ideas e comentarios, formado parte dos grupos de traballo que se han de formar e, por suposto, entrando a formar parte da Asociación que está aberta a todos vós.
Benvidos
Quen somos
A Asociación Galega de Custodia do Territorio é unha organización sen ánimo de lucro cuxo fin é a conservación dos valores naturais, culturais e paisaxísticos do territorio.
Comentarios recentes